മൂടൽമഞ്ഞ്

ഭാഗം 1 മൂടൽമഞ്ഞുള്ള പുലരിയിലൂടെ , തലേ ദിവസത്തെ രാത്രി മഞ്ഞു വീണ് ഈറനണിഞ്ഞ റോഡിലൂടെ ശാരിക പതുക്കെ തന്റെ കാർ ഡ്രൈവ് ചെയ്തു കൊണ്ടിരുന്നു. മൂടൽ മഞ്ഞിന്റെ ലാഘവത്വം കൂടിക്കൂടി പരിസരത്തിന്റെ ദൃശ്യങ്ങൾ സുതാര്യമായി വരുന്നതേയുള്ളൂ. ഒമ്പതു മണിയാവാൻ ഇനിയും പതിനഞ്ചു മിനുട്ട് ഉണ്ട്. ഓഫീസ് ടൈം ഒമ്പതു മണിയാണ്. തന്റെ ബിസിനസ്‌ സാമ്രാജ്യം വളർന്നു പന്തലിച്ചു അന്താരാഷ്ട്ര വിപണി വരെ കീഴടക്കിയെങ്കിലും ഇന്നും ശാരിക സമയത്തിന്റെ കാര്യത്തിലും ഉത്തരവാദിതങ്ങളുടെ കാര്യത്തിലും വിട്ടു വീഴ്ചയില്ലാത്ത കണിശത പുലർത്തുന്നു. അത് തന്നെയാണ് അവളുടെ വിജയത്തിന്റെ ചവിട്ടുപടികളിൽ ഒന്നും. ആരോടോ ഉള്ള ദേഷ്യമോ തന്നോട് തന്നെയുള്ള വാശിയോ തീർക്കുന്നത് പോലെ, തന്റെ മുപ്പത്തിലേക്ക് അടുക്കുന്ന പ്രായത്തിലും വിവാഹിതയാവാതെ, ഏകാകിനിയായി ബിസിനസ്സിൽ മാത്രം തന്റെ ജീവിതം ഉഴിഞ്ഞു വച്ചു ജീവിക്കുന്ന ശാരികയുടെ സ്വഭാവം വളരെ കർക്കശവും വെട്ടൊന്നു തുണ്ടം രണ്ട് എന്ന രീതിയിലുമാണ്. മുൻകോപവും പട്ടാള ചിട്ടയും അഹന്തയുമുള്ള അവളെ എല്ലാ തൊഴിലാളികൾക്കും ഭയമാണ്. ശാരിക.! മുപ്പത് വയസ്സ് പ്രായം വരുന്ന കോടീശ്വരിയായ യുവതി. അഞ്ചരയടി പൊക്കവും അധികം മെലിഞ്ഞതല്ലാത്ത, അംഗലാവണ്യം കൊണ്ട് മാത്രം ഏത് മനുഷ്യനെയും, സ്ത്രീകളെ പോലും അസൂയപ്പെടുത്തുന്ന സുന്ദരി.…