നിധിയുടെ കാവൽക്കാരൻ 26 [കാവൽക്കാരൻ] 518

ബാലു അങ്കിളിന്റെ ആ വാക്കുകൾ ജനക്കൂട്ടത്തിൽ വലിയൊരു ആവേശമുണ്ടാക്കി. അവർ ഉച്ചത്തിൽ മുദ്രാവാക്യം വിളിക്കുന്നത് പോലെ അലറാൻ തുടങ്ങി. തോക്കിൻ മുനയിൽ നിർത്താൻ കഴിയുന്നതിനും അപ്പുറത്തേക്ക് ആ നാട്ടിൻപുറത്തുകാരുടെ വികാരങ്ങൾ മാറിയിരുന്നു.

എന്ത് മറുപടി പറയണമെന്നറിയാതെ, മുറിവേറ്റ തന്റെ പോലീസുകാരെയും നോക്കി ആ ഓഫീസർ ശരിക്കും പകച്ചുനിന്നുപോയി. പഴുതുകളില്ലാത്ത പോലീസിന്റെ ആ വലിയ കവർ അപ്പ് ഓപ്പറേഷൻ അവിടെ പൂർണ്ണമായും പൊളിഞ്ഞു വീഴുകയായിരുന്നു….

പോലീസ് ഓഫീസറുടെ മുഖം കടുത്തു.

ചർച്ചകൾ കൊണ്ട് കാര്യമില്ലെന്ന് മനസ്സിലായ അയാൾ, ചുറ്റും നിൽക്കുന്ന തന്റെ സേനാംഗങ്ങൾക്ക് ഒരു മുന്നറിയിപ്പ് നൽകി.

“ഞാൻ അവസാനമായി പറയുകയാണ്, ആയുധങ്ങൾ താഴെ വെച്ച് എല്ലാവരും ഇവിടുന്ന് പിരിഞ്ഞുപോകണം. ഇല്ലെങ്കിൽ ഞങ്ങൾക്ക് ബലം പ്രയോഗിക്കേണ്ടി വരും. ആരെയും അറസ്റ്റ് ചെയ്യാൻ ഞങ്ങൾക്ക് മടിയില്ല!”

അയാളുടെ ശബ്ദത്തിൽ വെറുമൊരു ഭീഷണിയിലുപരി, കാര്യങ്ങൾ കൈവിട്ടുപോയതിന്റെ ഒരു കടുത്ത ജാള്യത ഉണ്ടായിരുന്നു.

എന്നാൽ ഈ ഭീഷണി ബാലു അങ്കിളിനെയും നാട്ടുകാരെയും ഒട്ടും സ്വാധീനിച്ചില്ല. മറിച്ച്, അങ്കിളിന്റെ കണ്ണുകളിൽ ഒരുതരം കത്തുന്ന പകയാണ് കണ്ടത്. അദ്ദേഹം മുന്നോട്ട് ഒരടി വെച്ച്, തോക്കിന്റെ കുഴൽ ആകാശത്തേക്ക് ഉയർത്തിപ്പിടിച്ച് ഉറക്കെ പറഞ്ഞു,

“ബലം പ്രയോഗിക്കാനോ? ഞങ്ങളുടെ മുറ്റത്ത് വന്ന് ഞങ്ങൾക്കിട്ട് തന്നെ ബലം പ്രയോഗിക്കാനോ സാർ വന്നത്? ഈ നാട്ടിൽ സ്വന്തം വീട്ടിലിരുന്ന് സമാധാനമായി ഉറങ്ങാൻ പോലും കഴിയാത്തവരാണ് ഞങ്ങൾ. ഇനി ഞങ്ങളെ പേടിപ്പിക്കാൻ നോക്കണ്ട!”