തമ്പുരാട്ടി 7 [രാമന്‍] 326

അനുഷേച്ചി നല്ലപോലെ ഡ്രൈവ് ചെയ്യുന്നുണ്ടായിരുന്നു.തിക്കും തിരക്കും കഴിഞ്ഞു മാളിൽ കേറിയപ്പോ മുതൽ ഞാനും വാവയും പോസ്റ്റായി. അനുഷേച്ചി ഏട്ടത്തിയേയും കൊണ്ട് കണ്ട ഷോപ്പ് മുഴുവൻ കേറിയിറങ്ങി. ഡ്രെസ്സും ചെരുപ്പും തുടങ്ങി ഏട്ടത്തിക്ക് വേണ്ടി ചേച്ചി പലതും വാങ്ങി.

“ഇതൊന്നും വാങ്ങണ്ടാന്ന് അനുഷയോട് ഒന്ന് പറയോ..ഞാൻ പറഞ്ഞിട്ട് കേൾക്കുന്നില്ല..” ഇടക്ക് ഏട്ടത്തി എന്റടുത്തു വന്നു സങ്കടത്തോടെ പറഞ്ഞപ്പോ. ഞാൻ കയ്യൊഴിഞ്ഞു.അനുഷേച്ചിക്ക് ഇഷ്ടള്ളോരേ കിട്ടിയാ പിന്നെ സ്നേഹിച്ചു കൊല്ലുന്ന ടൈപ്പാണ്.  ഞാൻ പറഞ്ഞാ കേൾക്കാൻ പോവുന്നില്ല! അല്ലേലും ഈ വരവ് പോലും ഏട്ടത്തിക്കും വാവക്കും ആവശ്യമുള്ള സാധനങ്ങൾ വാങ്ങാൻ വേണ്ടിയായിരുന്നു. ഇതിനാണെന്ന് പറഞ്ഞാ ഏട്ടത്തി വരില്ല എന്ന് കരുതി.അനുഷേച്ചി ഇട്ടൊരു ട്രിക്കായിരുന്നു.

വാവക്കും ഏട്ടത്തിക്കും ആവശ്യമുള്ളതെല്ലാം വാങ്ങി കഴിഞ്ഞപ്പോഴേക്കും സമയം കുറച്ചായി. ഞാൻ ഫോൺ കയ്യിൽ വെച്ച് അമ്മയെ വിളിച്ചു നോക്കിയാലോ എന്ന് ആയിരം വട്ടം ആലോചിച്ചു. പക്ഷെ വിളിക്കാൻ എന്തോരും മടി തോന്നി. സൈഡായുള്ള ഇരിപ്പ് കണ്ട് അനുഷേച്ചി എന്റെ കൈ പിടിച്ചു കൂടെ നടത്തിച്ചെങ്കിലും ഞാൻ ഫുൾ ഡൌൺ തന്നെ.

അങ്ങനെ മുകളിലെ നിലയിൽ ഇരുന്ന് ചായ ഊതി കുടിക്കുമ്പോ. ഫുഡ്‌ കഴിക്കാൻ ഏത് ഹോട്ടലിൽ പോണമെന്നു അനുഷേച്ചി ചോദിക്കുമ്പോ. ചേച്ചിയുടെ ഫ്രണ്ട് ആമി പെട്ടന്നെവിടുന്നോ പൊട്ടി വീണു. കൂടെ അനിയത്തിയും. പിന്നെ കെട്ടിപ്പിടിക്കലായി ചിരിയായി, ഏട്ടത്തിയോട് അന്വേഷണമായി. വാവയെ എന്റെ എടുത്തുനിന്ന് തട്ടിപ്പറിച്ചു കൊഞ്ചിക്കലായി! എന്റെ നേർക്ക് എന്തേലും ചോദ്യം വരുമ്പോ ഞാൻ ഓരോ ചിരി എങ്ങനേലും കൊടുക്കും. അപ്പോഴാണ് ആമി സിനിമക്ക് പോയാലോ എന്ന് ചോദിച്ചത്.ഇത്ര നേരം എങ്ങനെയോ കടിച്ചു പിടിച്ചു നിന്ന ഞാൻ, എങ്ങനെയെങ്കിലും അമ്മയുടെ അടുത്തെത്തി ഒന്ന് സംസാരിക്കാൻ കൊതിച്ച ഞാൻ ,ഇനി സിനിമക്ക് കൂടെ പോയാൽ!