നിധിയുടെ കാവൽക്കാരൻ 26 [കാവൽക്കാരൻ] 518

അവരുടെ മുഖത്ത് വല്ലാത്തൊരു ഭയവും സങ്കടവുമുണ്ടായിരുന്നു. ശ്വാസമടക്കിപ്പിടിച്ച് നിൽക്കുന്ന ഞങ്ങളുടെ എല്ലാവരുടെയും മുഖത്തെ ഭാവം കണ്ടതും അവർക്ക് കാര്യം മനസ്സിലായി.

“ഗീതാമ്മ താഴെവെച്ച് പറഞ്ഞതൊക്കെ പച്ചക്കള്ളമാണെന്ന് നിങ്ങൾക്ക് ഇതിനോടകം മനസ്സിലായിട്ടുണ്ടാകും…”

ഒരു വലിയ നെടുവീർപ്പോടെ ചേച്ചി പറഞ്ഞു തുടങ്ങി.

“ഇവിടെ ശരിക്കും എന്താ നടക്കുന്നതെന്ന് പറയാനാണ് ഞാൻ വന്നത്.”

ചേച്ചി പതുക്കെ ചെന്ന് നിധിയുടെ അടുത്തായി ആ ബെഡിലേക്ക് ഇരുന്നു. ശേഷം ശബ്ദം വളരെ താഴ്ത്തിക്കൊണ്ട് പറഞ്ഞു തുടങ്ങി:

“നിങ്ങൾ ഇവിടുന്ന് യാത്രപോയി രണ്ടു ദിവസം കഴിഞ്ഞപ്പോഴാണ് ഈ നാട്ടിൽ ആദ്യത്തെ സംഭവം നടക്കുന്നത്. അതിരാവിലെ റബ്ബർ വെട്ടാൻ പോയവരാണ് ആ കാഴ്ച ആദ്യം കാണുന്നത്… തോട്ടത്തിന് നടുവിലായി പിച്ചിചീന്തിയ നിലയിൽ ഒരു മനുഷ്യശരീരം! നരിമാടൻ ആക്രമിച്ചതാണെന്നാണ് ആദ്യം എല്ലാവരും കരുതിയത്. പക്ഷേ… തുടർന്നുള്ള ദിവസങ്ങളിൽ നാടിന്റെ പല ഭാഗങ്ങളിൽ നിന്നായി ഒന്നിനുപുറകെ ഒന്നായി അങ്ങനെയുള്ള ശരീരങ്ങൾ വീണ്ടും കിട്ടാൻ തുടങ്ങി!”

ചേച്ചിയുടെ കണ്ണുകളിൽ ആ ഭയാനകമായ കാഴ്ചകൾ മിന്നിമറയുന്നുണ്ടായിരുന്നു.

“മാംസം മുഴുവൻ വലിയ നഖങ്ങൾ കൊണ്ട് വലിച്ചുകീറിയ നിലയിലായിരുന്നു ആ ശരീരങ്ങളെല്ലാം! ചോര മുഴുവൻ ഊറ്റിക്കുടിച്ചതുപോലെ വിളറിവെളുത്ത ദേഹം… കുടൽമാലകൾ പുറത്തുചാടിയ ഭയാനകമായ അവസ്ഥ! ചിലരുടെയൊക്കെ തലപോലും ശരീരത്തിൽ ഉണ്ടായിരുന്നില്ല. ഈ ഇന്ദ്രനീലത്തിലെ ഓരോ വീട്ടുപറമ്പിലും, വഴിയരികിലുമൊക്കെയായി രാവിലെ നേരം വെളുക്കുമ്പോൾ ഇങ്ങനെയുള്ള ജഡങ്ങൾ കിടക്കുന്നത് ഒന്ന് ആലോചിച്ചു നോക്കൂ… ഈ നാട് മുഴുവൻ ഭയം കൊണ്ട് വിറയ്ക്കുകയായിരുന്നു.”